Qozog‘iston fuqaroligini olish qoidalari o‘zgaradi
Qozog‘iston fuqaroligini olishni xohlovchi xorijliklar hujjatlarni topshirishda yangi guvohnoma taqdim etishi kerak bo‘ladi. Bu haqda Tengrinews xabar berdi.
Ichki ishlar vazirining “Ochiq yuridik shaxslar” portalida e’lon qilingan Qozog‘iston Respublikasi fuqaroligiga qabul qilish masalalari bo‘yicha buyrug‘iga tegishli o‘zgartirishlar kiritildi.
“Qozog‘iston Respublikasi fuqaroligiga soddalashtirilgan (ro‘yxatga olish) tartibda qabul qilish”ning 5-bobiga quyidagi mazmundagi band qo‘shildi: arizaga quyidagi hujjatlar ilova qilinadi: Qozog‘iston hukumatining 2018-yil 31-yanvardagi 36-son qarori bilan tasdiqlangan daktiloskopiya va genomik ro‘yxatga olish qoidalariga muvofiq chet el fuqarosi yoki fuqaroligi bo‘lmagan shaxsning daktiloskopiyadan o‘tgani to‘g‘risidagi guvohnoma.
Shuningdek, chet el fuqarosiga Qozog‘iston respublikasida doimiy yashash uchun ruxsatnoma berishni rad etish uchun asoslar bo‘lsa, soddalashtirilgan tartibda fuqarolikka qabul qilish to‘g‘risidagi ariza rad etilishi mumkin. Ushbu asoslar nima ekanligi hujjatda ko‘rsatilmagan. Ilgari qoidalarda bunday band bo‘lmagan.
Ichki ishlar vazirining buyrug‘i 23-yanvarga qadar muhokama qilinadi.
Eslatib o‘tamiz, 2024-yilning 1-yanvaridan boshlab Qozog‘istonda xorij fuqarolari daktiloskopiyadan (barmoq izini qayd etishdan) o‘tishi shart. Qozog‘iston fuqarolari uchun protsedura ixtiyoriydir.
