Qozog‘istonda kimlarga yuqori maosh to‘lanadi? 

Qozog‘istonda kimlarga yuqori maosh to‘lanishi ma’lum bo‘ldi. Bu haqda Mehnat va aholini ijtimoiy muhofaza qilish vazirligiga tayanib, Tengrinews xabar berdi.

Elektron mehnat birjasi maʼlumotlariga ko‘ra, eng yuqori maosh sanoatning bosh texnologlariga — 954 ming tengedan (2 ming dollardan ortiq), quduqlarga xizmat ko‘rsatish muhandislariga – 800 ming tengedan (1700 dollardan ortiq) va arxitektorlarga – 700 ming tengedan (1500 dollardan yuqori) to‘lanadi. 

Bu ma’lumotlar fuqarolarning e’lon qilgan rezyumelari va ularning kutilayotgan ish haqi bo‘yicha taxminlari asosida tuzilgan. 

“O‘tgan yil davomida rejissyorlar va videooperatorlar uchun yuqori maosh taklif qilingan edi. Malakasi bo‘lmagan odamlar uchun ish haqi taklifi kamroq. Umuman olganda, malakasiz ishchilar, yarim malakali ishchilar va yuqori malakali ishchilar kabi toifalar mavjud. Hammasi ta’lim darajasi va ko‘nikmasiga bog‘liq. Yana hisobga olinadigan narsa tajribadir”, — deb tushuntirdi Mehnat vazirligi.

2023-yili Qozog‘istonda eng yuqori maosh tog‘-kon sanoatida smenali nazoratchilarga taklif qilingan edi — o‘rtacha 758 ming tenge (salkam 1700 dollar) .