O‘zbekiston Afg‘onistonga sarmoya kiritishga tayyor — “Tolibon”
O‘zbekiston, Turkiya, Rossiya, Eron va Qozog‘iston Afg‘onistonga sarmoya kiritishga tayyor. Bu haqda “Tolibon” matbuot kotibi Zabihulloh Mujohid ToloNews’ga ma’lum qildi.
Mujohidning ToloNews telekanaliga aytishicha, sanab o‘tilgan mamlakatlarning qator kompaniyalari 2024-yilda tog‘-kon sanoati va energetika sohalariga, jumladan, gidroelektr stansiyalari qurilishiga sarmoya kiritishi kerak.
“Tolibon” rasmiysi 2023-yili xorijiy sarmoyani jalb qilish bo‘yicha katta ishlar amalga oshirilgani, 2024-yil ham davom etishini aytdi. Bu masala hozircha ayrim kompaniyalar bilan muzokaralar bosqichida, biroq allaqachon ish boshlaganlar ham bor.
Iqtisodiyot vazirligi ko‘plab davlatlar Afg‘onistonga sarmoya kiritishga qiziqish bildirganini va ularga barcha zarur yordam ko‘rsatilishini taʼkidlagan. Vazirlikning qo‘shimcha qilishicha, xorijiy investorlar qishloq xo‘jaligi, savdo, energetika, temir yo‘l va infratuzilma loyihalariga sarmoya kiritishga tayyor.
“Milliy va xalqaro investorlar qishloq xo‘jaligi, savdo, energetika, temir yo‘l, avtomobil yo‘llari, infratuzilma loyihalariga sarmoya kiritishga qiziqish bildirmoqda”, — deydi iqtisodiyot vaziri o‘rinbosari Abdul Latif Nazari.
