Donald Tramp AQSH prezidentligi uchun poygada ilk g‘alabasini qo‘lga kiritdi
Donald Tramp Ayova shtatidagi respublikachilar kokusi ishtirokchilarining aksariyati tomonidan qo‘llab-quvvatlandi. Bu haqda New York Times AP agentligiga tayanib xabar berdi. Agentlik tahlilchilari birinchi saylov uchastkalarida ovoz berish natijalari e’lon qilingandan so‘ng darhol sobiq prezidentning g‘alabasini muqarrar deb hisoblashgan.
104 ming ovoz sanab chiqilganidan keyin Tramp 50,9 foiz ovoz to‘plagani ma’lum bo‘ldi. U shtatning 99 okrugidan 98 tasida yetakchilik qilmoqda. Florida gubernatori Ron DeSantis ikkinchi o‘rinda, uni shtat respublikachilarining 21,3 foizi qo‘llab-quvvatladi. AQSHning BMTdagi sobiq elchisi Nikki Xeyli 19,1 foiz ovoz bilan uchinchi o‘rinda. To‘rtinchi o‘rinni egallagan biznesmen Vivek Ramasvami o‘z saylovoldi tashviqotini yakunlaganini e’lon qildi.
NYT hisob-kitoblariga ko‘ra, ovozlarning 94 foizi hisoblab chiqilgan.
Ayova shtatidagi kokuslar an’anaviy ravishda Qo‘shma Shtatlardagi Respublikachilar partiyasi uchun partiya ichidagi saylovlarning birinchi bosqichi hisoblanadi. Keyingi navbatda Nyu-Xempshirda 23-yanvar kuni bo‘lib o‘tadigan praymeriz bor. Respublikachilardan nomzod bahor oxirigacha aniqlanadi va partiyaning iyuldagi qurultoyida rasman ko‘rsatiladi.
