NATO 90 ming askar ishtirokida Yevropadagi eng yirik mashg‘ulotlarni boshlaydi
Shimoliy Atlantika alyansi kelasi hafta Yevropadagi so‘nggi o‘n yillikdagi eng yirik Steadfast Defender-2024 mashg‘ulotlarini boshlaydi, unda 90 000 askar ishtirok etadi.
Bu haqda NATO ittifoqchi kuchlarining Yevropadagi oliy qo‘mondoni, general Kristofer Kavoli ma’lum qildi.
“Bugun biz kelasi hafta boshlanadigan va may oyigacha davom etadigan Steadfast Defender-2024 mashqlari boshlanganini e’lon qilamiz. Streadfast Defender NATOning so‘nggi o‘n yilliklardagi eng yirik mashg‘uloti bo‘ladi, unda alyansning barcha davlatlaridan taxminan 90 000 askar, shuningdek, hamkorimiz Shvetsiyadan harbiylar ishtirok etadi”, — dedi u.
Kristofer Kavolining so‘zlariga ko‘ra, alyans mashqlar davomida kuchlarni Shimoliy Amerikadan Yevropaga o‘tkazish orqali Yevro-Atlantika mintaqasi mudofaasini kuchaytirish qobiliyatini namoyish etadi.
