O‘zbekistonga 2024-yilda gepatit C ga qarshi Misrdan olib kelinadigan dori vositalari miqdori ma’lum qilindi
O‘zbekiston prezidentining С gepatitiga chalingan bemorlarni 100 foiz davolash bo‘yicha tashabbusi ijrosi doirasida dori vositalarining Misrdan kelishi 2024-yilda ham davom etadi, deb xabar bermoqda “Dunyo” AA.
O‘zbekistonning Qohiradagi elchixonasi xabariga ko'ra, Misr hukumati tomonidan 2025-yilga qadar umumiy qiymati 4,2 million dollar bo‘lgan jami 800 ming dona С gepatitiga qarshi “Daklatasvir” va “Sofosbuvir”, B gepatitiga qarshi “Entekavir” dori vositalarining beg‘araz yordam sifatida berilishi bo‘yicha kelishuvga erishilgan.
Hozirga qadar umumiy qiymati 696 ming dollarga teng bo‘lgan mazkur dori vositalari O‘zbekistonga bosqichma-bosqich yuborildi.
2024-yil 20-yanvar kuni Misr hukumati tomonidan insonparvarlik yordami sifatida ajratilgan C gepatitiga qarshi “Sofosbuvir-400mg” dori vositasi yetkazib berildi. Umumiy 12 dona qutilarda 6720 dona Sofosbuvir-400mg” dori vositalari O‘zbekiston Sog'liqni saqlash vazirligi huzuridagi Virusologiya ilmiy-tekshirish instituti tomonidan bemorlarga taqsimlanadi.
