Rossiya TIV tarixchi Smolinning “1917-yilgi inqilobgacha o‘zbeklar mavjud bo‘lmagani” haqidagi gaplariga izoh berdi
NTV telekanalidagi ko‘rsatuvda rus tarixchisi Mixail Smolin 1917-yilgi inqilobgacha o‘zbeklar xalq sifatida mavjud bo‘lmagani haqida gapirgandi. Rossiya Tashqi ishlar vazirligi rasmiy vakili Mariya Zaxarova Smolinning bayonotiga izoh berib, bu tarixchining shaxsiy fikri ekanini aytdi.
“Rossiya va Markaziy Osiyo mamlakatlarini umumiy tarix va insonparvarlik aloqalari, savdo-iqtisodiy munosabatlar bog‘lab turadi. Bizning chinakam yaqin hamkorligimiz, strategik sherikligimiz va aksariyat hollarda ittifoqdoshligimiz bir-biriga hurmat va madaniyatlar muloqotiga asoslangan.
Ishonchimiz komilki, Markaziy Osiyo mintaqasining suveren va mustaqil davlatlari bunday munosabatlarning ahamiyatini to‘liq tushunadi.
Qayd etilgan g‘alati bayonotlar tabiatan sof subyektivdir, yuqorida aytib o‘tilgan voqeliklar bilan hech qanday umumiylik yo‘q va bu butunlay muallifning vijdoniga havola”, — dedi Zaxarova.
21-yanvar kuni Vladimir Ilich Lenin vafot etganiga 100 yil to‘lishi munosabati bilan “Uchrashuv joyi” tok-shousida rus shovinist tarixchisi Mixail Smolin “inqilobdan oldin ozarbayjon, o‘zbek va qozoqlar hech qachon bo‘lmagan”, degan daʼvo bilan chiqqandi.
“Qozog‘iston qanday paydo bo‘lganiga qarang! Darhaqiqat, dastlab RSFSR tarkibida Qozog‘iston SSR deb atalgan, ungacha qozoqlar umuman yo‘q edi. Millatlarning shakllanishiga oid qarorlar shu qadar ixtiyoriy qabul qilingan.
O‘zbeklar, masalan, inqilobgacha hech qachon bo‘lmagan, bunday nom yo‘q edi. Markaziy Osiyoning bir qancha xalqlaridan o‘zbeklarni olib, yaratdilar.
Ozarbayjonlar kimlar, bunday millat yo‘q”, — degan Smolin.
Eslatib o‘tamiz, avvalroq Rossiya TIV yozuvchi Zaxar Prilepinning shu mazmundagi bayonotiga ham javob qaytargan va uning so‘zlari Moskvaning rasmiy pozitsiyasini aks ettirmasligini bildirgan.
