Rossiyada terrorizmni moliyalashtirishda ayblangan O‘zbekiston fuqarosi 9 yilga qamaldi

Rossiyaning Murmansk viloyatidagi Shimoliy flot harbiy sudi O‘zbekiston fuqarosini terrorchilik faoliyatiga ko‘maklashgani uchun 9 yilga ozodlikdan mahrum qildi. Bu haqda sud matbuot xizmatiga tayanib, “TASS” xabar berdi.

“Shimoliy flot harbiy sudi O‘zbekiston fuqarosi Rossiya Jinoyat kodeksining 205-modda 1-qismida nazarda tutilgan jinoyat bo‘yicha aybdor deb topib, 9 yil muddatga ozodlikdan mahrum etdi. Bunda u dastlabki 3 yilni qamoqxonada, olti yilini qattiq tartibli koloniyada o‘taydi”, — deyiladi xabarda.

Tergov va sudning aniqlashicha, 2021-yilning iyul-avgust oylarida Arxangelsk viloyatida yashagan sudlanuvchi xalqaro terrorchilik tashkiloti a’zosiga ikki marotaba pul o‘tkazmasini amalga oshirgan.

Eslatib o‘tamiz, 2022-yilda Toshkentdan turib Suriyadagi jangarilarni moliyalashtirgan erkak 10 yilga ozodlikdan mahrum etilgandi. 2023-yil sentyabrda esa Toshkent shahar IIBB xorijdan turib o‘zini diniy ulamo sifatida ko‘rsatib, radikal g‘oyalarni tarqatib kelayotgan fuqarolardan ogoh bo‘lishga chaqirgan edi.