Olmaotada 2 soat ichida uchta zilzila sodir bo‘ldi
Qozog‘istonning Olmaota shahrida 28-yanvar kuni uchta zilzila sodir bo‘ldi. Bu haqda Orda.kz xabar berdi.
Har uchala holatda ham zilzila episentrlari Xitoyda joylashgan. Seysmologlarga ko‘ra, Olmaotaga faqat aftershoklar yetib kelgan. Birinchi zilzila Ostona vaqti bilan soat 13:47 da, ikkinchisi 14:01 da, uchinchisi 15:52 da sodir bo‘lgan.
Zilzila epimarkazlari Olmaotadan 258 km, 285 km va 337 km janubi-sharqda Xitoy hududida joylashgan. Yer silkinishlari 5 km, 10 km va 20 km chuqurlikda sodir bo‘lgan.
Qozog‘iston Favqulodda vaziyatlar vazirligi avvalroq 23-yanvardan buyon shaharda 1900 ta zilzila sodir bo‘lganini, bu dushanbadan seshanbaga o‘tar kechasi Olmaota aholisini qo‘rqitgan zilzilalardan keyingi silkinishlar ekanini ma’lum qilgandi. Mutaxassislar seysmik faollik asta-sekin to‘xtab, normal holatga qaytishini aytmoqda.
