O‘zbekistonda yillik inflyatsiya darajasi 9 foizgacha bo‘lishi kutilmoqda

“O‘zbekiston – 2030” strategiyasini “Yoshlar va biznesni qo‘llab-quvvatlash” yilida amalga oshirish bo‘yicha davlat dasturi va uni tasdiqlash to‘g‘risidagi prezident farmoni loyihalari ishlab chiqilib, jamoatchilik muhokamasi uchun www.uzbekistan2030.uz veb-saytiga joylashtirildi.

Farmon loyihasi bilan barqaror iqtisodiy o‘sish orqali aholi farovonligini ta’minlash yo‘nalishi doirasida:

• YIM o‘sish sur’atini 6 foizdan kam bo‘lmagan darajada, investitsiyalarni esa YIM hajmiga nisbatan kamida 30 foiz bo‘lishini ta’minlash choralari ko‘riladi;
• iqtisodiyot tarmoqlarida 18 milliard dollarlik 309 ta yirik loyihalar ishga tushiriladi;
• yillik inflyatsiya darajasini 9 foizgacha va fiskal taqchillikni 4 foizgacha bo‘lishi ta’minlanadi, keyinchalik inflyatsiya va davlat byudjeti taqchilligi ushbu ko‘rsatkichdan pasaytirilishi choralari ko‘riladi;
• iqtisodiyotga 275 trillion so‘m kredit resurslarini yo‘naltirish, shu jumladan, 41 trillion so‘mlik mikromoliya xizmatlari ko‘rsatilishi ta’minlanadi;
• banklar tomonidan taqdim etiladigan kredit stavkalarini bozor mexanizmlari asosida 2–3 foiz bandga pasaytirish uchun zarur sharoitlar yaratiladi.