Tayson Fyuri va Oleksandr Usik o‘rtasidagi to‘qnashuv 17-fevral kuni bo‘lib o‘tadi. Jang haqida ma’lumotlar
Saudiya Arabistonining Ar-Riyod shahrida 17-fevral kuni boks bo‘yicha og‘ir vazn toifasida mutlaq chempionlik uchun jang bo‘lib o‘tadi.
Super og‘ir vazn toifasida WBA Super, IBF, WBO va IBO kamarlari sohibi Oleksandr Usik va WBC chempioni Tayson Fyuri mutlaq jahon chempionligi uchun ringga ko‘tariladi. Oradan 25 yil o‘tgach, og‘ir vazn toifasida mutlaq jahon chempioni paydo bo‘ladi. So‘nggi bor 1999-yilda Lennoks Lyuis Evander Holifildni mag‘lub etib, ushbu e’tirofga sazovor bo‘lgandi.
Usik va Fyuri bir necha yil oldin jang bo‘yicha kelishib olgandi va nihoyat ular ringda uchrashadigan bo‘ldi. So‘nggi bor Usik 2023-yilning avgust oyida Daniel Dyubuani texnik nokaut evaziga mag‘lub etgandi. Fyuri esa oktyabr oyida Frensis Ngannu ustidan hakamlar qaroriga ko‘ra g‘alaba qozongandi.
Turnir doirasida 8 ta jang bo‘lib o‘tadi. E’tiborli jihati, o‘zbekistonlik yengilmas bokschi Bahodir Jalolov (14-0) ham ushbu turnirda o‘z jangini o‘tkazadi. Xabarlarga ko‘ra, chernogoriyalik Dilan Prashovich Jalolovning raqibi bo‘ladi.
Joy — Saudiya Arabistonining Kingdom Arena stadioni. Aynan shu joyda Fyuri va Ngannu o‘rtasidagi jang bo‘lib o‘tgandi. Shuningdek, Dmitriy Bivol, Entoni Joshua va Deontey Uaylder o‘rtasidagi turnir ham Kingdom Arena’da o‘tkazilgandi.
