NATO bosh kotibi urush paytida Ukrainaga qancha yordam yuborilganini aytdi
Rossiyaning Ukrainaga keng ko‘lamli bosqini boshlanganidan beri Qo‘shma Shtatlar Kiyevga taxminan 75 milliard dollar yordam ko‘rsatdi. Bu haqda NATO bosh kotibi Yens Stoltenberg ma’lum qildi, deb yozmoqda Politico nashri.
Shu bilan birga, u AQSH ukrainalik himoyachilarga rus bosqinchilariga qarshi turishda yordam berayotgan yagona davlat emasligini ta’kidladi. Bosh kotibning so‘zlariga ko‘ra, Yevropaning qator davlatlari yalpi ichki mahsulot ulushi bo‘yicha Ukrainaga AQSHdan ko‘ra ko‘proq harbiy yordam ko‘rsatyapti.
“Boshqa ittifoqchilar va hamkorlar 100 milliard dollardan ortiq hissa qo‘shdi, agar yalpi ichki mahsulot ulushi sifatida o‘lchanadigan bo‘lsa, ko‘pchilik ittifoqchilar AQSHdan ko‘ra ko‘proq yordam beryapti”, — dedi NATO bosh kotibi.
Uning ta’kidlashicha, Ukrainadagi urush “qirg‘in urushi”ga aylanib bormoqda, bu esa Yevropa va Amerika mudofaa sanoatidan ishlab chiqarishni ko‘paytirishni talab qiladi, chunki Rossiyaning Ukrainaga qarshi urushi boshlanganidan keyin G‘arb davlatlari o‘q-dorilar ishlab chiqarishda “jiddiy bo‘shliqlarni topdi”.
