Chinoz tumaniga yangi hokim tayinlandi
Sherzod Solihov Chinoz tumani hokimi etib tayinlandi. Bu haqda Toshkent viloyati hokimligi matbuot xizmati xabar berdi.
U bunga qadar Toshkent tumani hokimining moliya-iqtisod va kambag‘allikni qisqartirish masalalari bo‘yicha birinchi o‘rinbosari — tuman iqtisodiy taraqqiyot va kambag‘allikni qisqartirish bo‘limi boshlig‘i lavozimida faoliyat yuritayotgan edi.
Sherzod Solihov 1982-yili Toshkent tumanida tug‘ilgan. Maʼlumoti oliy. 2004-yili Toshkent davlat pedagogika universiteti, 2017-yili O‘zbekiston Respublikasi Prezidenti huzuridagi davlat boshqaruv akademiyasini tamomlagan.
Sherzod Salixov mehnat faoliyatini Toshkent tumanidagi Alisher Navoiy nomidagi shirkat xo‘jaligida ishchi vazifasida boshlagan. Shuningdek, faoliyati davomida u “Abduhakim baraka” fermer xo‘jaligi rahbari, Zangiota tumani “Navoiy mirishkor” agrofirmasi rahbari, Toshkent tumani hokimining qishloq va suv xo‘jaligi masalalari bo‘yicha o‘rinbosari singari masʼul vazifalarda ishlagan.
