“El-yurt umidi” jamg‘armasi Prezident administratsiyasiga o‘tkaziladi
“El-yurt umidi” jamg‘armasi Prezident administratsiyasi huzuriga o‘tkaziladi. Bu haqda 5-fevral kuni Shavkat Mirziyoyev raisligida o‘tkazilayotgan yig‘ilishda ma’lum qilindi.
Endi jamg‘arma hisobidan yoshlarni chet elga o‘qishga yuborishda malakali va sifatli injener hamda texnologlar tayyorlashga ustuvorlik beriladi. Xorijda o‘qitish bo‘yicha yangi tizim joriy etiladi.
Shuningdek, Oliy ta’lim, fan va innovatsiyalar vazirligiga 116 ta oliygohni o‘rganib, ularni yiriklashtirish dasturini ishlab chiqish, ularga “milliy”, “davlat” universiteti, akademiya yoki institut maqomini berishning aniq mezonlarini belgilash topshirildi.
Ma’lumot uchun, mutaxassislarni xorijda tayyorlash va vatandoshlar bilan muloqot qilish bo‘yicha “El-yurt umidi” jamg‘armasi 2018-yilda tashkil etilgan. Jamg‘arma xorijda yashayotgan va ishlayotgan vatandoshlar, ayniqsa, katta ilmiy salohiyatga ega bo‘lgan olimlar, mutaxassislar va iste’dodli yoshlar bilan o‘zaro hamkorlikni yo‘lga qo‘yish, jahon mehnat bozorida raqobatbardosh va yuqori malakali kadrlar tayyorlash va malakasini oshirish kabi maqsadlarda tashkil etilgandi.
