O‘zbekistonda 2024-yilda prezident maktablari taʼlim dasturi yana 1000 ta maktabda boshlanadi
Shavkat Mirziyoyev raisligida o‘tkazilayotgan yig‘ilishda maktab taʼlimidagi islohotlarni yanada jadallashtirishga qaratilgan vazifalar belgilab berildi. Bu haqda prezident matbuot kotib xabar berdi.
O‘tgan yili Respublika ilmiy-metodik markazi tashkil etildi. Shu bilan birga, o‘tgan hafta Loyiha ofisi tashkil qilindi va katta ilmiy-amaliy tajribasi bor, salohiyatli kadrlar jamlandi.
Markaz va ofisga Maktabgacha va maktab taʼlimi, Oliy taʼlim vazirliklari bilan birgalikda:
- maktablarda matematika, fizika, kimyo, biologiya va xorijiy tillar bo‘yicha o‘quv reja va dasturlarini xalqaro standartlar asosida yangilash;
- o‘quvchilar bilimi, tahliliy, tanqidiy va kreativ fikrlashi, muammolarga yechim topib, amaliyotda qo‘llay olish ko‘nikmalarini shakllantirishga qaratilgan o‘quv metodikalarini ishlab chiqish topshirildi.
Bunda, tan olingan xorijiy dasturlar (A-level, IB kabi), o‘quvchi va muallimlar bilimini baholashda xalqaro tajribalar (PISA, TIMSS, PIRLS) bosqichma-bosqich joriy etiladi.
Shuningdek, 2024-yilda Prezident maktablari taʼlim dasturi yana mingta maktabda boshlanadi. Hokimlar ularni moddiy-texnik bazasini yaxshilashga masʼul bo‘ladi.
Ixtisoslashtirilgan maktablar haqida
2022-yil 14-aprel kuni prezidentning “Prezident ta’lim muassasalari agentligi tizimidagi ixtisoslashtirilgan maktablar tarmog‘ini kengaytirish to‘g‘risida”gi farmoni imzolangan. Unga ko‘ra, 2023-yil 1-iyunga qadar faoliyati tugatilgan mehribonlik uylari va bolalar shaharchalari negizida 5 ta ixtisoslashtirilgan maktab-internati hamda 3 ta ixtisoslashtirilgan maktab; 2022—2024-yillarda Prezident ta’lim muassasalar agentligi tizimida 25 ta ixtisoslashtirilgan maktab-internatlari qurish hamda kelgusida yangi ixtisoslashtirilgan maktab-internatlar va ixtisoslashtirilgan maktablarni faqat agentlik tizimida tashkil etish kabi vazifalar belgilab berilgan.
