Toshkentning Bektemir tumani hokimi lavozimidan ozod qilindi

Bektemir tumani hokimi Tapil Mahamadziyayev lavozimidan ozod etildi.

Bu haqda 6-fevral kuni Toshkent shahar hokimi vazifasini bajaruvchi Shavkat Umurzoqov qarori qabul qilindi.

17-yanvar kuni bo‘lib o‘tgan videoselektor yig‘ilishida prezident bosh vazirga yil davomida auksionga umuman yer chiqarmagan Baliqchi, Jalaquduq, Bektemir, Mirobod, Olmazor, Chilonzor, Yunusobod, Yakkasaroy tumanlari hokimlarining lavozimiga loyiqligini hal qilishni topshirgandi.

Tapil Mahamadziyayev 2021-yilning iyun oyida Bektemir tumani hokimi lavozimiga tayinlangan edi.

Tuman hokimi vazifasini vaqtincha bajarish tuman hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Fathulla Nigmanovga yuklatildi.