Olaf Shols: “Ukraina yaqin orada qurol yetishmovchiligiga duch kelishi mumkin”
NATO davlatlari Rossiya bilan ziddiyatga kirishishni xohlamaydi, dedi Germaniya kansleri Olaf Shols. U NATOni Rossiya-Ukraina mojarosiga tortishga bo‘lgan har qanday urinishlarga AQSH va Yevropa Ittifoqi qarshilik ko‘rsatishini ta’kidladi. Shu bilan birga, kansler Ukraina tez orada jiddiy qurol taqchilligiga duch kelishi mumkinligini aytib o‘tdi.
“Bizning qo‘llab-quvvatlashimizga qaramay, Ukraina tez orada jiddiy qurol va o‘q-dorilar yetishmasligiga duch kelishi mumkin. Ba’zi moliyaviy majburiyatlar allaqachon tugadi, boshqalari esa uzaytirilishi kerak”, — deydi Shols The Wall Street Journal uchun yozgan maqolasida.
Olaf Shols Yevropa Ittifoqi Ukrainaning eng yirik moliyaviy homiysi ekanligini, Germaniya yordami esa Amerikadan keyin ikkinchi o‘rinda turishini ta’kidladi.
Amerika matbuoti so‘nggi haftalarda Ukraina armiyasida qurol-yarog‘ yetishmayotgani haqida xabar bermoqda. AQSH Kongressi 2023-yil kuzidan beri Ukrainaga yordam berish borasida kelisha olmayapti. Bir kun avval, 7-fevral kuni AQSH Senatida ikki partiya o‘rtasida mablag‘ ajratish, jumladan, Kiyevni qo‘llab-quvvatlash bo‘yicha kelishuv protsessual ovoz berishdan o‘tmadi.
Yevropa Ittifoqida Ukrainani moliyalashtirish mexanizmlari borasida bahslar davom etmoqda. OAV xabarlariga ko‘ra, Germaniya Yevropa tinchlik jamg‘armasining ish sxemasidan norozi bo‘lgan.
