Qashqadaryoda 600 dan ziyod fuqaroni qariyb 6,5 mlrd so‘mga chuv tushirgan sheriklar qidirilmoqda
Qashqadaryo viloyatida 600 dan ziyod fuqaroni qariyb 6,5 milliard so‘mga chuv tushirgan sheriklar qidirilmoqda. Bu haqda IIV axborot xizmati xabar berdi.
Keltirilishicha, Farg‘onaning Dang‘ara tumanida 1993-yilda tug‘ilgan S.N. o‘tgan yilning 19-sentyabr kuni Qarshi shahrida “Qarshi kredit” MCHJ ochgan. Unga Toshkent shahrida 1999-yilda tug‘ilgan S.J.ni ish boshqaruvchi etib tayinlagan. Biroq S.J. savdo-sotiq, reklama ishlari bilan shug‘ullanishi kerak bo‘lsa-da, ko‘plab fuqarolarning pullarini kredit berish orqali jalb etishga erishgan.
Jinoiy sheriklar birgalikda juda ko‘p mablag‘larni o‘zlashtirish maqsadida fuqarolarga dastlabki to‘lov evaziga kreditga pul berishga kelishib, oldindan 20 foizini olib qolgan, vaʼda qilingan pullarni mijozlarga naqd pul shaklida berishini aytgan. Shu orqali ular 606 nafar fuqarodan 6 milliard 462 million 550 ming so‘m pullarni qabul qilib olgan.
Holat yuzasidan 2023-yil 4-oktyabr kuni Qarshi shahar IIO FMB tomonidan Jinoyat kodeksining tegishli moddalari bilan jinoyat ishi qo‘zg‘atilgan. Gumonlanuvchilar nomaʼlum tomonga yashiringani sababli ularga qidiruv eʼlon qilingan. Ular haqida xabar berganlarning shaxsi sir saqlanishi kafolatlanadi.
