Zelenskiy Zalujniydan dadilroq harbiy rejani kutgan, ammo kutgani amalga oshmadi — Bloomberg
Bloomberg’ning Ukraina harbiy rahbariyatiga yaqin manbalari 8-fevral kuni ishdan bo‘shatilgan Qurolli kuchlar bosh qo‘mondoni Valeriy Zalujniy va Zelenskiy o‘rtasidagi kelishmovchiliklar ham prezidentning xohishi bilan bog‘liqligini ma’lum qildi.
Zelenskiy Zalujniydan “dadilroq harbiy rejani” kutgan, ammo kutgani amalga oshmagan. Aksincha, Zalujniy kelgusi oylarda frontda ehtiyotkorroq harakatlarni afzal ko‘rishini ma’lum qilgan.
Valeriy Zalujniy o‘rniga avvalroq Ukraina armiyasi quruqlikdagi qo‘shinlariga rahbarlik qilgan Aleksandr Sirskiy Ukraina Qurolli kuchlari bosh qo‘mondoni etib tayinlandi. Bloomberg suhbatdoshlaridan biri Zalujniy yangi bosh qo'mondonni tanlashda ishtirok etganini aytdi. Ammo Aleksandr Sirskiy, agentlikning qayd etishicha, Ukraina Qurolli kuchlari saflarida katta ishonchga ega emas.
Zalujniydan farqli o‘laroq, u Rossiyada o‘sgani sababli ukrain tilida aksent bilan gapiradi. Shu bilan birga, u o‘zidan oldingi qo‘mondonga qaraganda shafqatsizroq sanaladi, deb ta’kidlaydi Bloomberg.
Vladimir Zelenskiy bilan muntazam aloqada bo‘lgan bir qancha G‘arb rasmiylari agentlikka g‘alaba Ukraina prezidenti istaydigan yagona natija bo‘lib qolishini aytdi. Agentlik manbalarga tayanib xabar berishicha, Zalujniy Vladimir Zelenskiy ishonchini yo‘qotgani uchun ishdan bo‘shatilgan.
Bloomberg e’tiborini Vladimir Zelenskiy va Valeriy Zalujniy o‘rtasidagi ommaviy mojaro AQSH rasmiylari yangi yordam paketi bo‘yicha kelisha olmagan paytda, Ukraina uchun nomaqbul vaqtda sodir bo‘lganiga qaratadi. Bundan tashqari, agar Donald Tramp qaytadan prezident etib saylanadigan bo‘lsa, AQSH tomonidan Ukrainaning qo‘llab-quvvatlanishi keskin qisqarishi mumkinligi aytilmoqda.
