Makron xavfsizlik sababli Ukrainaga tashrifini bekor qildi — OAV
Fransiya prezidenti Emmanuel Makron rejalashtirilganidek 13 va 14-fevral kunlari Ukrainaga tashrif buyurmaydi. Bu haqda Challenges xabar berdi.
Yelisey saroyi, tashrif xavfsizlik sabab qoldirilganini ma’lum qildi. Bu ham fransuz, ham ukrainalik diplomatlarda ko‘plab savollar tug‘dirgan, ular bundan “hayratlangan”. Fransiya prezidenti dastlab Odessaga tashrif buyurishi, so‘ng Kiyevga borishi rejalashtirilgan edi. U 200 million yevrolik fuqarolik loyihalari uchun xayriyalarga sarflanadigan fond yaratilishini e’lon qilishi kutilgandi.
Qayd etilishicha, Ukrainaga tashrifni Medef International fransuz-ukraina biznes uyushmasi ham bekor qilgan. Makronning Kiyevga safari endi qachon amalga oshishi haqida rasmiy ma’lumot berilmagan.
10-fevral kuni Ukraina prezidenti Vladimir Zelenskiy Fransiya prezidenti Emmanuel Makron bilan telefon orqali muloqot qilgandi. Natijada tomonlar Parij Ukrainaga o‘nlab “Sezar” artilleriya tizimlari, shuningdek, ular uchun snaryadlar ishlab chiqarishi va berishi haqida kelishib olgandi.
