Stressli ish kunidan so‘ng xotirjam dam olish uchun nima qilish kerak?
Agar xotirjam holda chinakamiga dam olishni istasangiz, smartfonlaringizni yig‘ishtirib qo‘yib, yotishdan oldin boshqa ishlar bilan shug‘ullaning.
Yoga bilan shug‘ullaning
Yurak urishi tezligini oshiradigan va asab tizimidagi stressni kuchaytiradigan kuchli jismoniy mashqlardan farqli o‘laroq, yoga bilan shug‘ullanish tanani tinchlantiradi.
Tanangizga diqqatni jamlash va nafas olish stressdan xalos bo‘lishga yordam beradi va asab tizimining tinch faoliyatga o‘tishiga yordam beradi. Natijada qisqa seansdan so‘ng, turli xil xavotirli fikrlar sizni bezovta qilmaydi, uyqu yaxshilanadi.
Meditatsiya qiling
Meditatsiya yoki har qanday obyekt yoki hodisaga to‘liq diqqatni jamlash bu — xotirjamlikni tiklashning eng yaxshi usullaridan biri.
Boshlanishiga diqqatni nafas olishga qarating. Ko‘zlaringizni yuming, dam oling va tanangizda paydo bo‘ladigan his-tuyg‘ularga e’tibor bering.
Shuningdek, miyangizdagi fikrlarga yoki atrofdagi tovushlarga e’tibor qaratishingiz mumkin. Meditatsiyadan so‘ng nafaqat o‘zingizni xotirjam his qilasiz, balki ertasi kuni ertalab ham shu holatni saqlab qolasiz.
Badiiy kitob o‘qing
Ijtimoiy tarmoqlar turli xil ma’lumotlarga to‘la, ularni o‘zlashtirish juda oz vaqt talab etadi. Qisqa postlar, kulgili suratlar, yozishmalar, bir necha soniyalik videolar — bularning barchasi uzoq vaqt bir narsaga e’tibor qaratishga imkon bermaydi va charchagan miyangizni yanada ko‘proq holdan toydiradi.
Shu bilan birga, o‘qish stressni mukammal darajada yengillashtiradi, ko‘p vazifalarni bajarishdan tanaffus olishga imkon beradi.
Keraksiz stressning oldini olish uchun qiziqarli roman tanlang va fantastik dunyoda yashab ko‘ring. Bu muammolaringiz va tashvishlaringizdan xalos bo‘lishning ajoyib usuli, shuning uchun uxlab qolish ham ancha oson bo‘ladi.
Rasm chizish
Rasm chizish — stressni yengillashtirish va kayfiyatni yaxshilashning ajoyib usuli. Bundan tashqari, ushbu faoliyat uchun juda ko‘p imkoniyatlar mavjud.
Siz istagan narsani chizishingiz yoki his-tuyg‘ularingizni mavhumlikda ifodalashingiz, har qanday texnikada ishlashingiz yoki shunchaki tayyor rasmlarni bo‘yashingiz ham mumkin.
Telefonda yaqinlaringiz bilan suhbatlashing
Bugungi kunda tezkor messenjerlar orqali muloqot shu qadar odatiy holga aylanganki, odamlar telefon qo‘ng‘iroqlarini deyarli unutib qo‘ygan. Ular ko‘pincha shoshilinch ma’lumotlarni qisqacha uzatish uchun ishlatiladi va do‘stona munosabatlar yozishmalar orqali saqlanadi.
Shu bilan birga, his-tuyg‘ularni ovozga qaraganda matnda yetkazish ancha qiyin. Do‘stingiz yoki qarindoshingiz bilan kechki payt qo‘ng‘iroqlashing. Bunda yozishmalardan ko‘ra ko‘proq ijobiy his-tuyg‘ularni boshdan kechirishingiz shubhasiz.
