Qirg‘iziston prezidenti Sadir Japarov 20 mln dollarlik mulki borligini tan oldi
Qirg‘iziston prezidenti Sadir Japarov mulkining qiymati 20 million dollarni tashkil etadi. Bu haqda uning o‘zi ijtimoiy tarmoqlarda ma’lum qildi.
Japarovning so‘zlariga ko‘ra, u ushbu mulkni qonuniylashtirish uchun davlatga 1 million qirg‘iz somi to‘lagan.
"Mening xorijda jamg‘armalarim yo‘q, agar bo‘lsa ham, ularni banklarimizga qo‘ygan bo‘lardim. Men namuna bo‘lmoqchi bo‘ldim va birinchi bo‘lib o‘z mulkimni qonuniylashtirdim”, - dedi prezident.
Shuningdek, u Bishkekda binosi borligini ham ma’lum qildi.
“Biz bu binoni 2005-yilda qura boshlaganmiz va 2010-yilda tugatganmiz.Aprel inqilobidan keyin u “Ata-Jurt” partiyasining shtab-kvartirasi sifatida foydalanilgan.Muxolifatda bo‘lganimiz uchun taʼqibga uchraganimizga qaramay, yer va bino uchun muntazam ravishda soliq to‘laganmiz.
2020-yilda prezidentlik saylovlarida binodan shtab sifatida foydalanganman. O‘shandan beri u to‘liq ishga tushdi. Albatta, avvallari binolarim boshqa shaxslar nomiga rasmiylashtirilgan bo‘lsa, endi ularni o‘z nomimga qonuniylashtirish to‘g‘risidagi qonun asosida rasmiylashtirdim”, - dedi Japarov.
U boy fuqarolarni o‘z mulklarini qonuniylashtirish imkoniyatidan foydalanishga chaqirdi.