Qozog‘istonda sovuqda yo‘lda qolgan 64 nafar o‘zbekistonlik evakuatsiya qilindi. Ularning 17 nafari bolalar

Qozog‘istonning Aqmo‘la viloyatida yo‘lda qolib ketgan 64 nafar o‘zbekistonlik yo‘lovchi evakuatsiya qilindi, deb xabar bermoqda Kazinform. Ularning 17 nafari bolalar.

Viloyat Favqulodda vaziyatlar departamenti matbuot xizmati xabariga ko‘ra, 15-fevral kuni Ostona—Chelyabinsk yo‘nalishida harakatlanayotgan yo‘lovchi avtobusi Jaqsi—Yesil—Buziliq yo‘lidagi Jaqsi qishlog‘i yaqinida buzilib qolgan.

Jaqsi tumani qutqaruvchilari zudlik bilan chaqiruv joyiga yetib borgan. Ular buzilgan avtobusda bo‘lgan 64 nafar yo‘lovchini Jaqsi qishlog‘idagi maktabda joylashgan isinish joyiga olib borgan. Qayd etilishicha, yo‘lovchilar tibbiy yordamga muhtoj bo‘lmagan.

So‘nggi kunlarda Qozog‘iston hududlarida ob-havoning keskin sovishi natijasida yo‘llarda harakatlanish bilan bog‘liq qator noqulayliklar yuzaga kelmoqda. Shu munosabat bilan Tashqi mehnat migratsiyasi agentligi ushbu davlatda bo‘lib turgan O‘zbekiston fuqarolaridan zarurat bo‘lmaganda uzoq masofali yo‘llarda harakatlanmaslikni so‘radi.