O‘zbekiston hududiga Rossiyadan qurol olib o‘tishga urinish holatlari aniqlandi
Qoraqalpog‘iston Respublikasida bojxona posti orqali qurol va o‘q dorilarni yashirincha olib o‘tishga uringanlar to‘xtatib qolindi. Bu haqda bojxona boshqarmasi matbuot xizmati “Daryo”ga ma’lum qildi.
Qayd etilishicha, “Dovud-ota” chegara bojxona postiga Rossiyadan Lada Largus rusumli avtotransport vositasida kirib kelgan fuqaroning qo‘l yuklari va bagaji bojxona nazoratidan o‘tkazilgan. Tekshiruv davomida uning qora rangli sumkasi ichidan yo‘lovchi bojxona deklaratsiyasida ko‘rsatilmagan, bojxona xodimining og‘zaki so‘rovida maʼlum qilinmagan, tegishli ruxsatnomalarga ega bo‘lmagan 1 dona 4,5 millimetrli “Stalker” nomli pnevmatik to‘pponcha, 25 dona pnevmatik pistolet gaz ballonlari hamda 1482 dona pnevmatik to‘pponcha o‘qlari borligi aniqlangan.
Xuddi shunday yana bir holatda “Dovud-ota” chegara bojxona postiga Lacetti rusumli avtotransport vositasida kirib kelgan fuqaro bojxona nazoratidan o‘tkazilganida 1 dona 9 mmli “Ansar BRT” nomli shovqinli to‘pponcha hamda 36 dona 9 mmli “R.A.K” nomli rezina uchli patronlarni Rossiyadan Qozog‘iston orqali O‘zbekistonga olib o‘tayotgani aniqlangan.
Mazkur holatlar yuzasidan bojxona organlari tomonidan surishtirish ishlari olib borilmoqda.
Avvalroq “Yallama” chegara bojxona post xodimlari tomonidan O‘zbekistonda faoliyat olib borayotgan masʼuliyati cheklangan jamiyatlardan birining nomiga kuryerlik jo‘natmalari bojxona nazoratidan o‘tkazilganida uning ichidan pnevmatik to‘pponcha chiqqani to‘g‘risida xabar berilgandi.
