Zelenskiy: ‘‘Tramp Ukrainaga kelsa, u bilan frontga borishga tayyorman’’

Ukraina prezidenti Vladimir Zelenskiy agar AQSHning sobiq prezidenti Donald Tramp mamlakatga tashrif buyursa, u bilan birga frontga borishga tayyorligini aytdi. Ukraina prezidenti bu haqda Myunxen xavfsizlik konferensiyasidagi jurnalistlar bilan suhbatda ma’lum qildi.

Men Trampni Ukrainaga taklif qildim. Lekin bu uning xohishiga bog‘liq, — dedi Zelenskiy.

Ukraina yetakchisining qo‘shimcha qilishicha, u AQSH prezidentligiga barcha nomzodlar, har ikki Amerika partiyasi vakillari bilan muloqotga tayyor, chunki ular Rossiya—Ukraina urushida haqiqatda nimalar sodir bo‘layotganini bilishi kerak.

Agar janob Tramp kelsa, men u bilan birga frontga borishga tayyorman. Biz urushni qanday tugatish haqida o‘ylasak, odamlarga urushning bor dahshatini ko‘rsatishimiz kerak. Instagram’da bu haqda yozilayotgan postlar boshqa, haqiqiy urush umuman boshqacha, — deya qo‘shimcha qildi Ukraina prezidenti.