Jazoir BMTga Isroilni qoralagan rezolyutsiya taqdim etdi
18-fevral kuni Jazoir Isroilning Falastin anklaviga qilgan vayronkor hujumi fonida G‘azo sektorida zudlik bilan o‘t ochishni to‘xtatishga chaqiruvchi rezolyutsiya loyihasini Birlashgan Millatlar Tashkilotiga taqdim etdi. Bu haqda xalqaro nashrlarga asoslanib, Anadolu agentligi batafsil xabar bermoqda.
Xabarda aytilishicha, rezolyutsiya loyihasi 20-fevral kuni BMT Xavfsizlik kengashida ovozga qo‘yiladi. Agar mazkur rezolyutsiya ko‘pchilik tomonidan qo‘llab-quvvatlansa, Isroil oldida faqatgina harbiy amaliyotlarni to‘xtatish yo‘ligina qoladi.
Jazoir BMT Xavfsizlik kengashining doimiy aʼzosi emas. Jazoir taqdim etgan loyihaga kengashda veto huquqiga ega bo‘lgan AQSH qarshi chiqishi taxmin qilinmoqda.
AQSHning BMTdagi vakili Linda Tomas-Grinfild ham Jazoirning rezolyutsiya loyihasi qabul qilinmasligiga va Vashington loyihani rad etish uchun veto huquqidan foydalanishi mumkinligiga ishora qilgan.
Xabarda aytilishicha, Jazoir loyihasi xalqaro Jinoyat sudining o‘tgan oydagi Isroil rejimi ustidan chiqargan qaroriga asoslanib, G‘azoda gumanitar maqsadlarda zudlik bilan o‘t ochishni to‘xtatishga chaqiradi.
