Peskov: “Rossiya va Armanistonning Ukraina bo‘yicha pozitsiyalari tubdan farq qiladi”
Moskva va Yerevanning Ukraina bo‘yicha pozitsiyalari tubdan farq qiladi. Bu haqda Rossiya prezidenti matbuot kotibi Dmitriy Peskov jurnalistlarga ma’lum qildi.
Avvalroq Armaniston bosh vaziri Nikol Pashinyan mamlakat Ukraina masalasi bo‘yicha Rossiya Federatsiyasining ittifoqchisi emasligi haqida bayonot bergandi.
“Haqiqatan ham, biz Ukrainada sodir bo‘layotgan voqealar va Ukraina atrofidagi mojaro bo‘yicha mutlaqo qarama-qarshi nuqtayi nazarga egamiz. Bu hech kimga sir emas. Biz bu borada ular bilan rozi emasmiz va o‘zimiz haq ekanligimizni qat’iyat bilan isbotlashda davom etamiz”, — dedi Kreml vakili.
Germaniyadagi arman diasporasi vakillari bilan uchrashuvda Pashinyan yana bir bor Yerevan Ukraina masalasida Moskvaning ittifoqchisi emasligini aytgandi.
