O‘zbekiston aholisi mart oyida necha kun dam oladi?
O‘zbekistonda besh kunlik ish haftasiga ega bo‘lgan fuqarolar mart oyida 13 kun, olti kunlik ish haftasiga ega bo‘lganlar esa 9 kun dam oladi.
2024-yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risidagi prezident farmoniga muvofiq, ish haftasining turidan qat’i nazar, barcha xodimlar uchun 22-mart, juma kuni va olti kunlik ish haftasida ishlaydigan xodimlar uchun 23-mart, shanba — qo‘shimcha dam olish kunlari etib belgilangan.
Xalqaro xotin-qizlar kuni munosabati bilan 8-mart juma, undan keyin esa 9 va 10-mart shanba va yakshanba kunlari dam olish kuni. 21-mart payshanba — Navro‘z bayrami kuni. Shu munosabat bilan o‘zbekistonliklar ketma-ket to‘rt kun dam oladi: 21, 22, 23 va 24-mart.
Oy davomida yana uch marta shanba va yakshanba kunlari borligi inobatga olinsa, besh kunlik ish haftasiga ega bo‘lgan o‘zbekistonliklar mart oyida 13 kun, olti kunlik ish haftasiga ega bo‘lganlar esa 9 kun dam oladi.
Mehnat kodeksi 187-moddasiga binoan, ishlanmaydigan bayram kunlari arafasida har kunlik ishning (smenaning) davomiyligi barcha xodimlar uchun kamida 1 soatga qisqartiriladi.
