Yevropa Ittifoqi Rossiyaga qarshi 13-sanksiya paketini ma’qulladi
Yevropa Ittifoqi Rossiyaga qarshi 13-sanksiya paketini tasdiqlab, uning doirasida 106 nafar jismoniy va 88 nafar yuridik shaxsga nisbatan cheklov choralarini kiritdi. Bu haqda YI bayonotiga tayanib, “TASS” xabar berdi.
Bayonotga ko‘ra, kengash Ukrainaning hududiy yaxlitligi, suvereniteti va mustaqilligiga putur yetkazuvchi yoki tahdid soluvchi harakatlar uchun javobgar bo‘lgan yana 106 nafar jismoniy va 88 yuridik shaxsga nisbatan cheklov choralarini qo‘llashga qaror qilgan. Shu tariqa YIning Rossiya uchun qora ro‘yxatiga 2 mingdan ortiq shaxs va kompaniyalar kiritilgan. Barcha shaxslarning YI mamlakatlari hududiga kirishi taqiqlanadi, agar ularning aktivlari aniqlansa, muzlatiladi.
13-sanksiya paketining bir qismi sifatida Yevropa Ittifoqi quyidagilarni kiritdi:
- Rossiya mudofaa sanoatini qo‘llab-quvvatlayotgan Rossiya Federatsiyasi va boshqa yettita davlatning (Hindiston, Xitoy, Shri-Lanka, Serbiya, Qozog‘iston, Tailand, Turkiya) 27 kompaniyasiga nisbatan cheklov choralari;
- dronlar va elektr transformatorlari uchun ehtiyot qismlarni Rossiya Federatsiyasiga yetkazib berish bo‘yicha eksport cheklovlari;
- KXDR mudofaa vaziri Kan Sun Namga nisbatan shaxsiy sanksiyalar.
