Lionel Messi AQSHda Krishtianu Ronaldudan deyarli 4 barobar mashhur
Oxirgi 10 yil ichida Messi va Ronaldu katta farq bilan shtatlarda eng taniqli futbolchilar bo‘lishdi. Biroq so‘nggi bir yil ichida argentinalik futbolchining Ronalduga nisbatan mashhurligi sezilarli darajada oshdi.
Bunga sabab qilib Messining JCh-2022 dagi g‘alabasi va “Inter Mayami”ga o‘tishini aytish mumkin. 2023-yil dekabr holatiga ko‘ra, Lionel so‘rovnomada 21,3% ovoz to‘plagan bo‘lsa, “Al-Nasr” hujumchisi 6 foizga yaqin ovozga ega bo‘ldi.
Bundan tashqari 2023-yilning yozidan buyon “Inter Mayami”da o‘ynab kelayotgan argentinalik futbolchi SSRS tomonidan o‘tkazilgan tadqiqotda birinchi o‘rinni egalladi. Kompaniya qariyb 30 yil davomida o‘z a‘zolaridan har oyda o'zlarining sevimli professional sportchilariga ovoz berishni so‘raydi, so'ngra natijalarni chorak bo‘yicha guruhlaydi.
Messi MLSga o'tishidan oldin turli davrlarda atigi 7 nafar sportchi eng yaxshi sportchi bo‘lishgan. Bu sportchilar: Maykl Jordan, Tayger Vuds, Peyton Menning, Kobi Brayant, Stiven Karri, Lebron Jeyms va Tom Bredi.
Messi 2023-yilning to'rtinchi choragidagi natijalarga ko‘ra eng mashhur sportchiga aylandi va reytingda birinchi o‘rinni egallagan birinchi futbolchiga aylandi.
Amerikacha futbol yulduzi Bredi 2023-yilning birinchi choragida, Jordan yilning ikkinchi va uchinchi chorakda yetakchilik qildi.
Messining transferidan keyin “Inter Mayami” amerikaliklarning sevimli MLS futbol klubiga aylandi – u “Los-Anjeles Gelaksi”ni ortda qoldirdi. Jamoaning muxlislari soni 5 barobardan ziyodga ko'paydi.
Shuningdek, so‘nggi so‘rovlarga ko'ra, “Inter Mayami” Amerikada mashhur futbol klublari umumiy ro‘yxatida 4-o‘rinni egalladi. Qo‘shma Shtatlarda bu klubdan faqat “Barselona”, “Real” va “Manchester Yunayted” mashhurroq.
