“Rossiya ozod bo‘ladi”. Navalniyni dafn etish marosimida yig‘ilganlar yangi shiorlar bilan chiqdi
1-mart kuni Moskvada Rossiya yetakchisi Vladimir Putinning siyosiy muxolifi Aleksey Navalniyni dafn marosimida yig‘ilgan minglab rossiyaliklar Aleksey Navalniy nomini hayqirib, yangi shiorlarni ko‘tarib chiqishgan. Namoyishchilar mamlakat rasmiylarini uning o‘limi uchun kechirmasliklarini aytishgan. Bu haqda Reuters nashri xabar berdi.
Moskvaliklar Navalniyni so‘nggi manzilga kuzatish uchun Moskvadagi Borisovskiy qabristoniga to‘planishgan. Navalniy jasadi esa avval cherkovga, u yerda dafn etish marosimining bir qismini bajarilgandan so‘ng esa qabristonga olib ketilgan.
Xabarda aytilishicha, Navalniy uchun yig‘ilganlar marhum uchun guldastalar va “Rossiya ozod bo‘ladi”, “Yo‘qolsin urush”, “Putinsiz Rossiya”, “Biz kechirmaymiz”, “Putin qotil” kabi shiorlarni ko‘tarib olishgan. Ichki ishlar xodimlari ularni to‘xtatishga urinishgan.
“Bu yerda 10 mingdan ortiq odam yig‘ildi. Ularning hech biri ovozini ko‘tarishdan qo‘rqmaydi. Biz bu yerga hech nimadan qo‘rqmagan inson xotirasiga hurmat bajo keltirish uchun keldik. Usiz Rossiya kelajagi juda achinarli. Biz taslim bo‘lmaymiz. Hamisha yaxshilikka umid qilamiz,“ — deya hodisaga munosabat bildirgan namoyishchilardan biri.
