APL. “Manchester Siti” derbida g‘alaba qozondi. Fodendan dubl, Holand eng samarali o‘yinchi (video)
Futbol bo‘yicha Angliya Premyer Ligasining 27-turidan o‘rin olgan o‘yinda “Manchester Siti” va “Manchester Yunayted” 3-mart, yakshanba kuni o‘zaro bahs olib bordi.
Uchrashuvning 8-daqiqasida mehmonlar hujumchisi Reshford super gol urib hisobni ochdi. Mezbonlar goldan so‘ng to‘liq ustunlikda harakat qilishiga qaramay, hisobni o‘zgartirishning uddasidan chiqa olmadi.
Ikkinchi bo‘limning 56-daqiqasida Foden ajoyib zarba bilan hisobni tenglashtirdi. 80-daqiqaga kelib Foden jamoasini oldinga olib chiqdi. Ikkinchi bo‘limning qo‘shib berilgan daqiqalar boshlanganida katta sahnaga Holand chiqdi. U himoyachining xatosidan unumli foydalanib, o‘z hisobiga gol yozdirib qo‘ydi.
Erling Holand “Manchester Siti” safida “Yunayted”ga qarshi eng samarali o‘ynab kelayotgan futbolchi hisoblanadi. U so‘nggi to‘rt o‘yinda 6 gol va uchta assist qayd etdi.
Ushbu g‘alabadan so‘ng, “Siti” hisobidagi ochkolar 62 taga yetdi va jamoa “Liverpul” dan bir ochko ortda qolmoqda.
APL
27-tur bahsi
3-mart, yakshanba
“Manchester Siti” – “Manchester Yunayted” 3:1
Gollar: 0:1 – 8 Reshford, 1:1 – 56 Foden, 2:1 – 80 Foden, 3:1 – 90+1 Holand.
“Manchester Siti”: Ederson, Uoker, Ake, Ruben Diash, Stounz, de Bryuyne, Bernardu Silva, Rodri, Foden, Doku (Alvares, 59), Holand.
“Manchester Yunayted”: Onana, Diogu Dalot, Evans (Kambvala, 69), Varan, Lindelef, Brunu Fernandesh, Kazemiro, Maktominey, Maynu (Amrabat, 82), Garnacho (Forson, 82), Reshford (Antoni, 75).
Ogohlantirishlar: Varan (68).
