Turkiyada uysiz mushuk boshlang‘ich sinf o‘quvchilariga darslarni o'zlashtirishga yordam bermoqda
Turkiyaning Izmir shahridagi boshlang‘ich maktabda Tombi laqabli mushuk muntazam ravishda darslarga qatnashadi va bolalarga o‘qishda yordam beradi, deb yozadi “Korrespondent” nashri.
Avvaliga Tombi maktab bog‘ida bolalar bilan o‘ynar edi, bir necha hafta o‘tgach mushuk 3-sinf o‘quvchilari darslarida qatnasha boshladi. Sinf rahbari O‘zlem Pinar mushuk bolalar o‘qishiga xalaqit berishidan xavotir olgandi, lekin buning aksi bo‘lib chiqdi — Tombi tufayli bolalar darslarga ko‘proq ishtiyoq bilan qatnasha boshladi. Hatto ba’zi o‘quvchilar mushukka g‘amxo‘rlik qilish uchun darsga barvaqt kelar edi.
O‘qituvchi O‘zlem bolalar xavfsizligi uchun mushukni emlatdi, biroq ota-onalardan biri bunday holatga qarshi chiqdi. Tombi bolalar sog‘lig‘iga xavf solishi mumkin deya mushukni maktabdan haydab chiqarishni talab qilishdi.
O‘zlem Tombi uchun yangi egalar topdi, ammo u boshqa uyda uch kundan ortiq yashay olmadi. O‘qituvchi mushukni o‘z xonadoniga olib kelganda ham hayvon bezovta bo‘laverdi. Shunda O‘zlem Tombi haqidagi hikoyani ijtimoiy tarmoqda ulashdi:
“Ushbu voqea omma e’tiborini tortdi va hatto televideniyega olib chiqildi. Bunda meni ko‘pchilik qo‘llab-quvvatlaganidan mamnunman”, — dedi u.
Natijada mushukning sinfda bo‘lishiga qarshi chiqqan ota-ona ham fikrini o‘zgartirdi va Tombi maktabga qaytdi.
“Tombi sinfga qaytganidan bolalar ham, mushuk ham birdek baxtiyor edi”, — deb qo‘shimcha qildi o‘qituvchi.
O‘zlem Pinarning o‘zi esa mushuk haqida “Shanliurfadagi Tombi” nomli kitobini yozdi. Asar 2018-yilda chop etildi va O‘zlem bolalar yozuvchisi faoliyatining boshlanishiga turtki bo‘ldi.
