Apple Qozog‘istonda rasmiy ofisini ochishi mumkin
Qozog‘iston Amerikaning Apple kompaniyasi bilan muzokaralar olib bormoqda. Bu haqda Raqamli rivojlanish, innovatsiyalar va aerokosmik sanoat vazirligiga tayanib, Tengrinews xabar berdi.
Vazirlikka ko‘ra, muzokaralar Qozog‘istonda Apple kompaniyasining rasmiy ofisini ochish bilan bog‘liq. Qo‘shni respublikada Apple ofisini ochish masalasi shu yilning 23-yanvarida Olmaotada sodir bo'lgan zilziladan keyin paydo bo‘ldi. O‘shanda iPhone foydalanuvchilari smartfonlariga ogohlantirishlar kelmagan. Agar Apple Qozog‘istonda o‘z vakolatxonasini ochsa, bu Markaziy Osiyoda birinchisi bo‘ladi.
2021-yilda O‘zbekistonda Apple va Netflix vakolatxonalari ochilishi haqidagi maʼlumotlar keng muhokama qilingan edi.
“Dunyodagi top-10 likka kiradigan Samsung kompaniyasining respublikamizda to‘rtta rasmiy ofisi ochildi. Yaqin kunlarda Apple kompaniyasining ham rasmiy ofislari ochilishi rejalashtirilmoqda”, — degan o‘shanda Axborot texnologiyalari va kommunikatsiyalarini rivojlantirish vazirligi axborot xizmati rahbari Sherzod Ahmatov.
Biroq o‘shandan beri bu haqda hech qanday ma’lumot bo‘lmagan.
