47 nafar Ukraina fuqarosi G‘azodan shoshilinch evakuatsiya qilindi
12-mart kuni G‘azo hududidan 47 nafar Ukraina fuqarosi shoshilinch evakuatsiya qilindi. Fuqarolar dastlab Moldovaga olib kelingan. Bu haqda Ukraina harbiy razvedka boshqarmasi tarqatgan maʼlumotga asoslanib, The Kyiv Independent nashri xabar berdi.
Xabarda aytilishicha, G‘azodan xorijliklarni evakuatsiya qilish 1-noyabr kuni Misr Rafah nazorat-o‘tkazish punktini ochgandan so‘ng boshlangan. G‘azoda bo‘lgan ukrainaliklarning birinchi guruhi 7-noyabrda sektordan chiqishga ruxsat olgan. Birinchi evakuatsiya operatsiyasida G‘azodan jami 363 nafar Ukraina fuqarosi evakuatsiya qilingani xabar berilgan.
47 nafar fuqaro evakuatsiya qilingan so‘nggi operatsiya Ukraina mudofaa vazirligi hamda Ukrainaning Isroil va Misrdagi elchixonalari diplomatik xodimlari tomonidan amalga oshirilgan. Fuqarolar G‘azodan olib chiqilgach, dastlab bir qancha payt Misrdagi mehmonxonaga joylashtirilgan. So‘ngra samolyotda Moldovaga ko‘chirilgan. Hozirda fuqarolar avtobusda Odessa hududiga olib ketilayotgani maʼlum qilingan.
