So‘nggi 24 soatda G‘azoda Isroil hujumlari oqibatida 100 ga yaqin falastinlik halok bo‘ldi — Al Jazeera

So‘nggi 24 soat ichida G‘azoda Isroil hujumlari oqibatida 100 ga yaqin odam halok bo‘lgan. Bu haqda Al Jazeera nashri G‘azo Sog‘liqni saqlash vazirligi tarqatgan maʼlumotga asoslanib, xabar berdi.

Xabarga ko‘ra, Isroil kuchlari harbiy amaliyot davom etayotgan G‘azo bilan bir qatorda, G‘arbiy Sohilda ham reydlar o‘tkazgan. Reydlarda 4 nafar falastinlik o‘ldirilgan. Ulardan 2 nafari voyaga yetmaganlar bo‘lgan.

So‘nggi sutka davomida G‘azoda Isroil hujumlari oqibatida 88 kishi vafot etgan. 200 ga yaqin mahalliy aholi vakillari og‘ir tan jarohatlari olgan. G‘azodagi Sog‘liqni saqlash vazirligi halok bo‘lganlar soni yana ko‘payishi mumkinligidan ogohlantirgan.

Maʼlumot o‘rnida, hozirga qadar G‘azoda Isroil hujumlari oqibatida 31 272 falastinlik halok bo‘lgani rasman maʼlum qilingan. 73 024 nafar fuqaro tan jarohati olgan.