Смартфон батареяси замонавий смартфонларнинг энг нозик деталлардан бири экани сир эмас. Айнан у қолган элементлардан кўра тезроқ емирилиб, алмаштиришни талаб этади. Аккумулятор узоқ вақт хизмат қилиши учун смартфонни қандай вазиятларда қувватлантиргичда қолдириш керак эмаслигини ёдда тутиш лозим. Hi-Tech.Mail.ru бу борадаги маълумотларни тўплаб тақдим этди.
Автомобильда
Замонавий смартфонлар ҳайдовчилар учун кўплаб имкониятларни тақдим этади. Бугунги кунда кўплаб гаджетларни сотиб олиш ва қурилмалар панелини электроника кўргазмасига айлантириш зарурати йўқ. Барча навигаторлар, антирадарлар ва бошқа кўплаб қурилмалар функциясини бир уринишда смартфонга ўрнатиш мумкин. Фақат битта нозик жиҳати бор. Узоқ йўлга отланилганда ҳайдовчи буларнинг барчасидан бир соатда маҳрум бўлмаслиги учун сифатли қувватлантиргични сотиб олишни унутмаслиги лозим.
Ҳайдовчилар кўпинча машинадаги смартфон секин қувват олаётганидан нолийди. Бунга Хитойнинг арзон қувватлантиргичлари айбдор бўлиб, улар мунтазам кучланиш даражасини таъминлай олмайди. Ҳар бир смартфонда бу каби ҳолат учун контроллер бор, у ўзига уланган қурилмаган доим «ишончсиз ёндашади» ва мос бўлмаган параметрларни аниқлаши билан максимал даражада хавфсиз режимга ўтиб олади.
Бироқ автомобилда оригинал қувватлантиргичдан фойдаланиш ҳам маълум хавфни юзага келтиради. Гап шундаки, двигатель ишга туширилганида борт тармоғида кучланиш ўйнайди ва у смартфон аккумуляторини «ўтирғизиб» қўйиши мумкин. Контроллер шунчаки бунга чора кўришга улгурмаслиги ва натижада ўзи куйиб қолиши мумкин. Бундай бўлмаслиги учун битта оддий қоидага риоя этиш керак — смартфонни автомобилдаги қувватлантиргичга двигатель ишга тушиб бўлганидан кейингина улаш лозим.
Ваннада ётиб
Смартфон билан ванна қабул қилган одамларни ток урганига оид хабарлар мунтазам учраб туради. Бунга ҳам кўпинча сифатсиз қувватлантиргичлардан фойдаланиш сабаб бўлади. Номаълум қувватлантириш қурилмаларини ишлаб чиқарувчилар деярли барча нарсани тежашга уринади. Масалан, изоляцияловчи пластмасса қопламаси сифатида арзон керамикадан фойдаланади, бу эса кучланишларда ишончли ҳимояни тақдим эта олмайди.
Бундан ташқари, ихчамликка интилиш ва материалларни тежаш ортидан бу каби қувватлантиргичларнинг юқори ва паст волтли платалари қисмлари ораси очилмай қолиб кетади. Маълум шароитда, айниқса, намлик юқори бўлган вақтда улар орасида ёй пайдо бўлиб, ток уриши ёки смартфон бузилишига олиб келиши мумкин.
Момақалдироқ вақтида
Кўплаб ота-оналар ўз фарзандларини бекорга ёшлигидан момақалдироқ вақтида электр ускуналарини тармоқдан узиб қўйишга ўргатмайди. Замонавий смартфонлар ҳам бундан мустасно эмас. Уларни момақалдироқ вақтида қувватлантириб бўлмайди.
Албатта, бугунги кунда мутахассислар яшин урган вақтда электр узатиш тармоғида кучланишнинг «сакраши»дан ҳимоялашнинг имкониятларини қилмоқда. Хусусан, электр подстанцияларга махсус ҳимоя ускуналари, уларга ҳимоявий узишга қодир «шит»лар ўрнатиляпти. Аммо статистикага кўра ҳатто улар ҳам миллионлаб волтли кучланишда 100 фоиз ҳимоятини тақдим эта олмайди. Шундай экан қимматбаҳо гаджетни момақалдироқ вақтида қувватлантириш тавсия этилмайди.
Смартфондан фаол фойдаланилаётганида
Маълумки, смартфондаги операцияларнинг бажарилишига процессор жавоб беради. Оғир мобил дастурлар ишга туширилганида процессорнинг такт частотаси ошади — бу кўп қувват талаб этиб, аккумуляторнинг ишдан чиқишига олиб келади.
Бунинг устида смартфон қувватлантириш қурилмасига уланса, қўшимча қизиш юзага келади. Унутмаслик керакки, аккумуляторнинг 45 даражадан ортиқ ҳароратда қизиши ортга қайтариб бўлмас оқибатларни юзага келтиради. Бошқача қилиб айтганда, процессордаги юклама ортган вақтда қувватлантириш аккумулятор учун «ҳалокатли».
Қаттиқ совуқдан кейин
Совуқ ҳароратда смартфон тўлиқ ўчиб қолгани билан боғлиқ ҳолатга деярли барча дуч келган. Илиқ ҳароратга қайтилгач кўпчилик смартфонни ёқишга ва онлайн оламга қайтишга интилади. Аммо бундай қилиш мутлақо тавсия этилмайди. Смартфон нормал ҳароратга қайтиши учун 10—20 дақиқа кутиш керак.
Гап шундаки, паст ҳароратда батарея ичидаги электролит ўз хусусиятини тез йўқотади. Бундай ҳолатда қурилмани қувватлантириш батарея сиғимининг камайишига ва ички қаршиликнинг ортишига олиб келади.
Сувга тушиб кетган смартфонни қувватлантириш
Яна битта ҳолат — сувга тушиб кетган смартфонни қувватлантириш. Айрим фойдаланувчилар сувга тушиб кетган ва ёнмаётган смартфонни қувватлантиргич ёрдамида «жонлантириш»га уринади. Буни мутлақо амалга ошириб бўлмайди. Платага кирган намлик қисқа туташувга ва гаджетнинг тўлиқ ишдан чиқишига сабаб бўлиши мумкин.
Агарда телефон сувдан кейин ҳам ишлайверса, аввало уни яхшилаб қуритиш керак, масалан, фен ёрдамида. Шундай кейин кутиш керак бўлади — ҳар бир смартфон учун кутиш вақти турлича. Нима бўлганда ҳам смартфонни бир суткадан эрта тармоққа улаш хавфли.
Ёстиқ остидаги қувватлантиргич
Смартфон аккумуляторининг ишдан чиқишига олиб келадиган яна бир сабаб — уни тунда қувватлантиргичда қолдириш.
Кўпчилик ухлашдан олдин смартфонини «зарядка»га улаб, ёстиғининг остига қўяди. Шу орқали улар аккумулятордан иссиқликни чиқарадиган технологик тешикни беркитиб қўяди ва бу ёмон. Ёнғин содир бўлмаслиги мумкин, аммо кунлик шундай усулда фойдаланишда батареяда микрокуйишлар содир бўлади. Унутмаслик керакки, қувватлантириш вақтида смартфон қаттиқ ва силлиқ юзада, имкон қадар иситиш қурилмаларидан узоқда бўлсин.
Изоҳ (0)