Navalniy saylovlarda Putinning partiyasiga qarshi har qanday nomzodga ovoz berishga chaqirdi

Aleksey Navalniy o‘z tarafdorlari va muxolif saylovchilarni 2023-yil sentabrida bo‘lib o‘tadigan Rossiya saylovlarida ishtirok etishga va hukmron “Yedinaya Rossiya” partiyasiga qarshi har qanday nomzodga ovoz berishga chaqirdi. Bu haqda Meduza xabar berdi.

Muxolifatchi xuddi shu strategiyani 2011-yilgi saylov kampaniyasida ilgari surgan. Navalniy o‘z blogidagi maqolasiga ko‘ra, u hali ham “aqlli ovoz berish”ni eng yaxshi strategiya deb biladi, ammo 2023-yilgi vaziyatda bu qo‘llanmaydi, chunki hokimiyat muxolifat qo‘llab-quvvatlaydigan nomzodlarni “saylovdan chetlatibgina qolmay, balki qamoqqa ham oladi”. 

Bundan tashqari, Navalniy ovozlarni soxtalashtirish va saylov kuzatuvchilari faoliyatiga cheklovlar haqida ham yozgan. Muxolifatchi quyidagilarni ma’lum qilgan:

Xo‘sh, 2023-yilgi saylovda biror nimaga erishish mumkinmi? Menimcha, buning imkoni bor. Shunchaki, bizning maqsadlarimiz eng asosiylariga e’tibor qaratish:

1. Biz, muxolifat saylovchilari, saylovga borish odat va qoidasini saqlashimiz kerak. Ertami-kechmi, Rossiyada bu nisbatan erkin bo‘ladi. Ularni mag‘lub etishimiz kerak. Saylovdan ma’no yo‘qligiga o‘zimizni ishontirib, unga bormaslikka odatlansak, bu ish bermaydi.

2. Odamlarning saylovda ovoz berish istagini qo‘llab-quvvatlash kerak. Hududlarda munosib nomzodlar ko‘p. O‘zim shunday ahvoldamanki, ularning ismlarini aytmaganim ma’qul. Lekin har qanday holatda ham ular bizning ovozimiz va qo‘llab-quvvatlashimizga muhtoj.

3. Kuzatuv infratuzilmasi qoldiqlarini saqlab qolish nihoyatda muhimdir. Aytganimdek, ertami-kechmi, Rossiyada nisbatan erkin saylovlar bo‘ladi, lekin shu saylovlarda ham ular yana ovozlarni o‘g‘irlashga urinadi. Bizga tajribali kuzatuvchilar kerak bo‘ladi.

Menimcha, hozirgi vaziyatda biz orqaga qadam tashlashimiz va “Yedinaya Rossiya”ga qarshi har qanday nomzod uchun ovoz berish strategiyasiga qaytishimiz kerak. Hukmron partiya va uning nomzodlariga maksimal darajada zarar yetkazish uchun saylovga boring.

2023-yil 10-sentabrda 22 ta federatsiya subyekti va Ukrainaning anneksiya qilingan to‘rtta viloyati rahbarlari saylovi, Rossiyaning 16 ta va unga qo‘shilgan to‘rtta viloyati parlamentlariga saylovlar, shuningdek, davlat Dumasining to‘rt nafar deputati uchun qo‘shimcha saylovlar bo‘lib o‘tadi.