Rossiya Ukrainaga 30 dan ortiq raketa va dronlar bilan hujum qildi

6-sentabrga o‘tar kechasi Rossiya qo‘shinlari Ukraina hududiga havo va quruqlikdan raketalar, shuningdek, kamikadze dronlari bilan hujum qildi. Bu haqda Ukraina Qurolli kuchlarining Harbiy-havo kuchlari xabar berdi.

Jami 33 ta havo nishoni qayd etilgan, ulardan 23 tasi yo‘q qilingan. Ukraina Qurolli kuchlari maʼlumotlariga ko‘ra, havo hujumidan mudofaa kuchlari Rossiyaning yettita X-101/X-555/X-55 tipidagi havodan uchiriladigan raketalarini, bitta “Iskander-M” ballistik raketasini va 15 ta Shahed kamikadze dronlarini urib tushirgan.

Kiyev viloyati harbiy boshqarmasi boshlig‘i Sergey Popkoning aytishicha, Kiyev aralash hujumga uchragan, unda turli sinfdagi raketalar, jumladan, X-101/X-555/X-55 ishlatilgan. Popkon barcha raketalar havo hujumidan mudofaa tizimlari tomonidan yo‘q qilinganini ta’kidladi.

Kiyev viloyatida raketa parchalarining qulashi oqibatida savdo korxonasi hududida yong‘in sodir bo‘ldi, deb xabar berdi Favqulodda vaziyatlar davlat xizmati. Qurbonlar va jabrlanganlar yo‘q.

Shuningdek, Rossiya qo‘shinlari Odessa viloyatining Izmoil tumaniga uchuvchisiz uchoqlar bilan hujum qildi, dedi viloyat ma’muriyati rahbari Oleg Kiper. Uning so‘zlariga ko‘ra, hujumda qishloq xo‘jaligi korxonalaridan birining xodimi halok bo‘lgan. Kiper shuningdek, bir qancha aholi punktlarida vayronagarchilik va yong‘inlar qayd etilganini aytdi.