“Tolibon” O‘zbekistonda chegarachilar bilan muzokara olib bordi (foto)
“Tolibon” harakatining chegara rasmiylari O‘zbekistonda chegarachilar bilan uchrashdi. Bu haqda Bakhtar news xabar berdi.
Islom Amirligi nomidan delegatsiyaga 6-chegara brigadasi qo‘mondoni Mavlaviy Mansur va Hayraton portining tashqi aloqalar bo‘yicha direktori va komissari Mavlaviy Aminulloh boshchilik qilgan. “Qo‘shma muvofiqlashtirish” yig‘ilishida ishtirok etish maqsadida ular O‘zbekistoniga tashrif buyurib, rasmiylar bilan muzokara olib borgan.
Tomonlar nimalarni muhokama qildi?
Uchrashuvda tomonlar ikki davlat chegara xavfsizligini taʼminlash, chegara qo‘shinlari faoliyatini qanday muvofiqlashtirish, muammolarni hal qilish, umumiy chegaralarni himoya qilish, yaxshi munosabatlarni mustahkamlash masalalarini muhokama qilgan.
“Yakunda ular chegaradagi har qanday muammolarni hal qilishda hamkorlik qilishga va’da berdi”, — deyiladi xabarda.
Ma’lumot o‘rnida, 9-iyul kuni “Tolibon” harakatining Chegara va qabila ishlari vazirligi O‘zbekiston chegarachilari bilan uchrashgandi. Ular chegara hududlari aholisi duch kelayotgan muammolarni muhokama qilgan. Afg‘onistonning amaldagi rasmiy vakillari terrorchi guruhlarning O‘zbekistonga qarshi Afg‘oniston tuprog‘idan foydalanishiga yo‘l qo‘ymaslikka va’da bergan.
