Qrimda Rossiya Qora dengiz floti qarorgohiga raketa kelib tushdi (video)

Anneksiya qilingan Qrimdagi Sevastopol shahri meri Mixail Razvojayev Ukraina armiyasi Rossiyaning Qora dengiz floti qarorgohiga raketa hujumi uyushtirganini ma’lum qildi.

“Raketa parchasi Lunacharskiy teatri yaqiniga ham tushgan. Topganlardan unga yaqinlashmaslikni va 112 raqamiga qo‘ng‘iroq qilishni so‘raymiz. Voqea joyiga barcha tez yordam xizmatlari yetib kelgan. Jabrlanganlar haqidagi ma’lumotlarga aniqlik kiritilmoqda”, — dedi u.

Razvojayev Sevastopol aholisini xotirjamlikni saqlashga, zarba oqibatlari aks etgan fotosuratlar va videolarni chop etmaslikka chaqirdi.

“Qrim shamoli” Telegram kanali xabariga ko‘ra, flot bosh qarorgohi binosiga o‘nta tez yordam mashinasi yetib kelgan.

Razvojayevning bayonotidan oldin Sevastopol aholisi havo hujumidan mudofaa tovushlari eshitilganini aytishdi, deb yozmoqda “Diqqat, Yangiliklar” Telegram kanali.

Ayni paytda Sevastopolda havo trevogasi yangramoqda.