Qorabog‘ harbiylari Ozarbayjonga texnika va qurollarini topshirmoqda (video)

Qorabog‘dagi harbiy tuzilmalar o‘t ochishni to‘xtatish haqidagi kelishuv doirasida qurol-yarog‘ va harbiy texnikalarini topshirmoqda. Bu haqda Ozarbayjon Mudofaa vazirligi ma’lum qildi.

“25-sentyabr holatiga ko‘ra, ular sakkizta zirhli texnika, 37 ta dala artilleriyasi, bir nechta raketa va minomyotlar, 3 200 dan ortiq o‘qotar qurollar, tankka qarshi qurollar va havo hujumidan mudofaa tizimlari, shuningdek, 435 mingga yaqin o‘q-dorilarni topshirdi”, — deyiladi xabarda.

Qayd etilishicha, qo‘lga olingan artilleriya qurollari, turli maqsadlardagi harbiy texnika, qo‘l granatalari va boshqa o‘q-dorilar Kelbajar tumanidagi yig‘ish punktiga olib ketilgan.

Armaniston armiyasining qurolsizlangan askarlariga Qorabog‘ hududini ikkita yo‘lak orqali tark etish ta’minlandi, deb xabar bermoqda Ozarbayjon IIV.

Ular Lochin — Xonkandi va Kelbajar — Basarkechar yo‘nalishlarida shaxsiy transport va avtobuslarda chiqib ketishi mumkin.

Eslatib o‘tamiz, 19-sentyabr kuni Ozarbayjon Qorabog‘da “konstitutsiyaviy tuzumni tiklash” bo‘yicha aksilterror operatsiyasini boshladi.

Armaniston bosh vaziri Nikol Pashinyan Armaniston Ozarbayjon bilan harbiy harakatlarni amalga oshirish niyatida emasligini qayd etdi.

20-sentyabr kuni Qorabog‘ sulh va qurolsizlanish haqida eʼlon qildi. Ertasi kuni Ozarbayjonning Yevlax shahrida mamlakat hukumati vakillari bilan Qorabog‘dagi arman millatiga mansub aholi o‘rtasida muzokaralar boshlandi.