Litva Rossiya raqamiga ega avtomobillarga 6 oy ichida Yevropa Ittifoqini tark etish majburiyatini yukladi
2023-yil 11-sentyabrgacha Litvaga kelgan Rossiyada ro‘yxatdan o‘tgan davlat raqamlariga ega avtomobillar ushbu mamlakatni va butun Yevropa Ittifoqi hududini kirgan kunidan boshlab olti oy ichida tark etishi kerak. Bunday bayonot Litva bojxonasi tomonidan e’lon qilindi.
11-sentyabrdan boshlab Litva bojxona organlari Yevropa Ittifoqining Rossiyaga qarshi sanksiyalarni amalga oshirish bilan bog‘liq cheklovlar asosida Rossiya davlat raqamlariga ega avtotransport vositalarini mamlakatga kiritmayapti. Yevropa komissiyasi avvalroq tushuntirganidek, bu cheklovlar Rossiyada ro‘yxatdan o‘tgan avtomobillarni hatto vaqtinchalik foydalanish uchun olib kirishga ham taalluqli.
Kaliningradga tranzit uchun istisno
“Taqiq ushbu transport vositalariga, ularning egasi yoki haydovchisining fuqaroligidan qat’i nazar, amal qiladi”, — deb ta’kidlandi Litva bojxonasi saytida.
Undagi ma’lumotlarga ko‘ra, Rossiyada ro‘yxatdan o‘tgan hamda Rossiya fuqarolari Litva hududi orqali Kaliningrad viloyatiga o‘tib olishda foydalanadigan avtomobillar uchun bu qoida istisno qilinadi. Ular FTD tranzit hujjatini taqdim etishi kerak.
Litva bojxonasi, shuningdek, “Rossiyada ro‘yxatdan o‘tgan yoki Rossiyada ishlab chiqarilgan” transport vositalarini sotib olish yoki olib kirish bo‘yicha ogohlantirish berdi. Qonunni buzish jarimaga va/yoki transport vositasi musodara qilinishiga olib kelishi mumkin.
