Qirg‘izistonda kriminal avtoritet Qamchi Ko‘lboyev o‘ldirildi

Qirg‘izistonda 4-oktyabr kuni xalqaro jinoiy doiralarda “Kolya-qirg‘iz” nomi bilan tanilgan mahalliy kriminal avtoritet Qamchi Ko‘lboyev (Qamchibek Asanbek) hibsga olinishi chog‘ida o‘ldirildi. Bu haqda Qirg‘iziston Milliy xavfsizlik davlat qo‘mitasi matbuot xizmati xabar berdi.

Olib borilgan tezkor-qidiruv tadbirlari davomida Qamchibek Asanbek Blonder Pub restoranida ekani aniqlanib, maxsus bo‘linmalarning bir guruh askarlari uni qo‘lga olish uchun borgan. Jinoyatchi Xavfsizlik xizmati xodimlarining taslim bo‘lish haqidagi talablariga bo‘ysunmay, o‘qotar quroldan foydalangan holda qurolli qarshilik ko‘rsatgan.

“Milliy xavfsizlik davlat qo‘mitasi maxsus bo‘linmasi xodimlari bunga javoban o‘t ochdi”, — deyiladi xabarda.

Keyinroq shifokorlar Asanbekning o‘limini tasdiqlashdi. MXDQ xodimlari va tinch aholi vakillari orasida qurbonlar yo‘q.

Amalga oshirilayotgan ishlar doirasida uyushgan jinoiy guruhlarning faol aʼzolari va ularning rahbarlariga nisbatan tadbirkorlarning mol-mulkini o‘ta yirik miqdorda noqonuniy olib qo‘yish holatlari bo‘yicha bir qator jinoyat ishlari qo‘zg‘atilib, tergov harakatlari olib borilmoqda.