Belgiya Ukrainaga F-16 qiruvchilarini 2025-yilda bermoqchi

Belgiya hukumati 2025-yilda bir nechta F-16 qiruvchilarini Ukrainaga topshirishni rejalashtirmoqda. Bu haqda mamlakat mudofaa vaziri Lyudivin Dedonder RTL telekanali efirida ma’lum qildi.

Uning so‘zlariga ko‘ra, Belgiya shuningdek, ukrainalik uchuvchilarni o‘z hududida, Daniya va, ehtimol, Yevropa Ittifoqining boshqa davlatida o‘qitishni davom ettiradi. Bundan tashqari, Belgiya hukumati Ukrainaga beriladigan F-16 qiruvchilarining to‘liq parkiga xizmat ko‘rsatishni taklif qiladi.

Dedonder bu haqda Bryusseldagi NATO mudofaa vazirlarining uchrashuvi va Ukrainaga qurol yetkazib berish bo‘yicha aloqa guruhi yig‘ilishi oldidan bayonot berdi.

11-oktyabr kuni ertalab Ukraina prezidenti Vladimir Zelenskiy e’lon qilinmagan tashrif bilan Bryusselga keldi. U NATO mudofaa vazirlarining uchrashuvida qatnashadi.

Avgust oyida Niderlandiya va Daniya ukrainalik uchuvchilar uchun treningni tugatganidan so‘ng, 60 dan ortiq F-16 qiruvchi samolyotlarini Ukrainaga topshirishini ma’lum qilgandi. Norvegiya ham Kiyevga samolyotlarni va’da qilgan.