Isroil zarbalari oqibatida G‘azoda BMTning 10 dan ortiq xodimi halok bo‘ldi

Isroil aviazarbalari oqibatida Birlashgan Millatlar Tashkilotining falastinlik qochqinlarga yordam ko‘rsatish agentligi 11 nafar xodimi halok bo‘ldi. Bu haqda Reuters tashkilot bayonotiga asoslanib xabar berdi.

Halok bo‘lganlar — besh nafar o‘qituvchi, bir ginekolog, bir muhandis, bir psixolog va uch nafar yordamchi xodim edi.

“Ba’zilar o‘z uyida oila a’zolari bilan o‘ldirilgan. BMTning falastinlik qochqinlarga yordam ko‘rsatish agentligi ushbu yo‘qotishlar uchun hamkasblarimiz va oilalarimiz bilan birga qayg‘uda”, — deyiladi tashkilot xabarida.

O‘z navbatida, Xalqaro Qizil Xoch va Qizil Yarim Oy jamiyatlari federatsiyasi (IFRC) o‘zining besh a’zosi – to‘rt nafari G‘azoda va bir nafari Isroilda halok bo‘lganini ma’lum qildi.

So‘nggi ma’lumotlarga ko‘ra, HAMASning Isroilga hujumi oqibatida 1200 dan ortiq isroillik halok bo‘lgan. Falastin tomoni esa Isroil zarbalaridan 1100 dan ortiq odam o‘lgani haqida xabar berdi.