Kelin o‘g‘irlash haqida qirg‘iz filmi Janubiy Koreyadagi tanlovda bosh mukofotga sazovor bo‘ldi
Janubiy Koreyada bo‘lib o‘tgan 28-Pusan xalqaro kinofestivalida qirg‘izistonlik rejissor Mirlan Abdiqaliqovning “Kiz ala kachuu” (“Qiz olib qochish”) filmi qisqa metrajli filmlar tanlovida bosh mukofot bilan taqdirlandi. Bu haqda film prodyuseri Oltinoy Qo‘ychumanova o‘zining Facebook’dagi sahifasida ma’lum qildi.
4-oktyabrdan 13-oktyabrgacha davom etgan ushbu festival doirasida filmning jahon premyerasi bo‘lib o‘tdi. Kino tanqidchilarining fikricha, film tomoshabinlarga chuqur hissiy ta’sir ko‘rsatgan.
Rejissor Mirlan Abdiqaliqov o‘zining yangi kartinasida Qirg‘iziston uchun dolzarb muammo bo‘lgan qiz o‘g‘irlash mavzusini ko‘targan. Filmda voqealar Bishkekning yangi qurilayotgan hududlarida bo‘lib o‘tadi.
Osiyoning ushbu nufuzli festivalidagi g‘alaba Qirg‘iziston kinematografiyasi uchun muhim voqea bo‘ldi. U jahon jamoatchiligi e’tiborini qirg‘iz kinoijodkorlari ijodiga qaratadi.
