Chexiya mudofaa vaziri mamlakatni BMTdan chiqishga chaqirdi
Chexiya mudofaa vaziri Yana Chernoxova Bosh assambleya tomonidan Yaqin Sharqdagi vaziyat bo‘yicha qabul qilingan rezolyutsiya tufayli mamlakatni BMTdan chiqishga chaqirdi. Bu haqda u X ijtimoiy tarmog‘ida ma’lum qildi.
“Uch hafta oldin HAMAS 1400 dan ortiq isroillikni o‘ldirdi, 11-sentyabrda "Al-Qoida" tomonidan AQSHdagi teraktda halok bo‘lgan aholidan ko‘proq qurbon. Faqat 14 davlat, jumladan bizniki ham HAMAS tomonidan sodir etilgan ushbu misli ko‘rilmagan hujumga aniq qarshilik ko‘rsatdi. Men BMT uchun uyalaman”, — dedi Chernoxova.
Uning so‘zlariga ko‘ra, Chexiyaga “terrorchilarni” qo‘llab-quvvatlovchi va o‘zini himoya qilishning asosiy huquqini hurmat qilmaydigan tashkilotda o‘rin yo‘q.
27-oktyabr kuni BMT Bosh Assambleyasi arab davlatlarining Falastin-Isroil mojarosi hududida zudlik bilan sulh tuzishga chaqiruvchi rezolyutsiyasini qabul qildi.
120 davlat, jumladan, O‘zbekiston uni yoqlab ovoz berdi, 45 davlat betaraf, 14 davlat qarshi chiqdi: Isroil, AQSH, Avstriya, Xorvatiya, Chexiya, Gvatemala, Vengriya, Marshall orollari, Mikroneziya, Papua-Yangi Gvineya, Paragvay, Tonga va Fiji.
Isroilning BMTdagi doimiy vakili Gilad Erdan bundan keyin Birlashgan Millatlar Tashkilotining “endi qonuniylik yoki ahamiyati yo‘qligini” aytdi.
