Har lahzadan zavq olib yashashga undovchi multfilm va filmlar
Har bir inson ertami-kechmi, o‘limga yuz tutadi — bu rivojlanishning muqarrar bosqichi bo‘lib, unga har kim o‘zicha qaraydi. Kimdir Arya Stark kabi o‘limni eski do‘st deb hisoblaydi, boshqalari esa bu mavzu bo‘yicha fikr yuritish vaqtini iloji boricha kechiktiradi.
“Barcha mashaqqatlar bilan”
Ishlab chiqarilgan yili: 2018-yil
Rejissyor: Ueyn Roberts
Bosh rollarda: Jonni Depp, Zoi Doych, Vanessa Yang
Mashhur professor Richard shifokorlar unga to‘satdan saraton tashxisini qo‘yishganda depressiyaga tushadi. Bir necha hafta davomida o‘zining “omadsiz” hayoti haqida qayg‘urganidan so‘ng, bosh qahramon so‘nggi oylarni ko‘ngildagidek o‘tkazishga qaror qiladi. Barcha taqiqlar olib tashlanadi: Richard talabalari bilan noqonuniy moddadan tatib ko‘radi, ofitsiantni yo‘ldan ozdiradi va har kimga o‘z fikrini ularning yuziga aytadi.
“Koko siri”
Ishlab chiqarilgan yili: 2017-yil
Rejissyor: Li Unkrich, Adrian Molina
Ko‘plab tanqidchilar fikriga ko‘ra, “Koko siri” so‘nggi o‘n yillikning eng yaxshi multfilmlaridan biri. Film voqealari musiqachi bo‘lishni orzu qilgan 11 yoshli Migel atrofida sodir bo‘ladi. Oila qadimiy an’ana tufayli bosh qahramonga o‘zi yoqtirgan ish bilan shug‘ullanishni taqiqlaydi. Migel iste’dodini isbotlashga urinib, tasodifan O‘liklar mamlakatiga — ota-bobolarining dunyosiga tushib qoladi. U yerda vafot etgan qarindoshi bilan uchrashadi va birga sayohatga chiqadi: shu yerda u nima uchun barcha qarindoshlari musiqadan nafratlanishlarini bilib oladi. “Koko siri” sadoqat, sevgi va oilaviy an’analar mavzularini ko‘taradi. Shuningdek, u Meksika madaniyati va mamlakatda nishonlanadigan O‘liklar kunini rang-barang tarzda ifodalaydi. Multfilm bir nechta mukofotlarga nomzod bo‘lgan va hatto “Eng yaxshi animatsion film” nominatsiyasida “Oskar”ga sazovor bo‘lgan.
“Trumen”
Ishlab chiqarilgan yili: 2015-yil
Rejissyor: Sesk Guy
Bosh rollarda: Rikardo Darin, Xaver Kamara
Tomas ko‘p yillardan beri Kanadada yashaydi, lekin uning eng yaqin do‘sti Julian saraton kasalligiga qarshi kurashni davom ettirmaslikka qaror qilgani haqidagi xabardan keyin vatani Ispaniyaga qaytishga qaror qiladi. Tomas to‘rt kun ketma-ket do‘stini fikrini o‘zgartirishga ishontirishga harakat qiladi, ammo Julian so‘zida qat’iy. Tomas faqat do‘sti bilan birga bo‘lishi mumkin, shu bilan birga, u o‘limidan keyin Trumen laqabli itini qayerga qo‘yish haqida qayg‘uradi. G‘amgin va iliq ispan dramasi haqiqiy do‘stlik haqida hikoya qiladi.
“Qalb”
Ishlab chiqarilgan yili: 2020-yil
Rejissyor: Pit Dokter, Kemp Pauers
“Qalb” multfilmi baxtsiz hodisadan so‘ng ruhlar olamiga tushib qolgan musiqa o‘qituvchisi Jo Gardner haqida hikoya qiladi. Musiqachi tanasiga qaytish uchun 22 ismli g‘amgin hamrohi bilan bir qator sarguzashtlarni boshdan kechirishi kerak bo‘ladi, u hali Yerda o‘z taqdirini topa olmagan. To‘siqlar oldida ular hayotning asl qiymati nafaqat maqsadlarga erishishda, balki har bir daqiqadan zavqlanishda va o‘zini qanday bo‘lsa, shundayligicha qabul qilishda ekanini anglaydi. “Qalb” tanqidchilarning ijobiy fikrlari bilan birga, bir nechta nufuzli mukofotlarga, jumladan, eng yaxshi animatsion film uchun “Oskar”ga nomzod bo‘ladi. Multfilm katta yoshdagi tomoshabinlarda chuqur his-tuyg‘ular va mulohazalarni uyg‘otib, hayotning mazmuni, maqsadi va o‘zini o‘zi bilish mavzulariga bag‘ishlangan.
“Uchinchi yulduz”
Ishlab chiqarilgan yili: 2010-yil
Rejissyor: Xetti Dalton
Bosh rolda: Benedikt Kamberbetch
Jeyms o‘zining 29 yoshini oilasi bilan nishonlamoqda, chunki u og‘ir saraton kasalligidan azob chekayotgani uchun o‘ttiz yoshini nishonlay olmasligini biladi. Xastalik haqidagi xayollardan xalos bo‘lish uchun u uchta do‘sti bilan dengiz ko‘rfaziga so‘nggi safariga jo‘naydi. Bosh qahramon o‘limning muqarrarligiga ko‘nganiga ancha bo‘lgan. Sayohat davomida 3 do‘st oldindan aytib bo‘lmaydigan va kulgili vaziyatlarga duch keladi, bu esa Jeymsning so‘nggi kunlarini quvonch va zavq bilan to‘ldirishga yordam beradi.
“Tepaga”
Ishlab chiqarilgan yili: 2009-yil
Rejissyor: Pit Dokter, Bob Peterson
78 yoshli Karl marhum xotiniga bergan va’dasini bajarish uchun ajoyib sarguzasht haqidagi orzusini amalga oshirishga qaror qiladi — uyiga minglab sharlarni bog‘lab, Janubiy Amerikaning yovvoyi tabiatiga uchib ketadi. Besh yuz metrga ham uchmagan bobo tasodifan o‘zi bilan Rassell ismli quvnoq 8 yoshli qo‘shni bolani olib ketganini bilib qoladi. Bosh qahramonlar tomoshabinga nima uchun o‘limdan emas, balki chuqur yolg‘izlikda o‘tkazgan so‘nggi yillardan qo‘rqish kerakligini ko‘rsatib beradi.
“Vidolashuv”
Ishlab chiqarilgan yili: 2019-yil
Rejissyor: Lulu Vang
Bosh rollarda: Akvafina, Chjou Shuchjen
30 yoshli xitoylik yozuvchi Bruklinda yashaydi. Uning ideal hayotida bitta kamchilik bor — u o‘z vatanida Xitoyda yashovchi buvisini juda sog‘ingan. To‘satdan buvisi kasal bo‘lib, uzoq yashamasligi ma’lum bo‘ladi. Biroq yaqinlari unga bu haqda aytib, xafa qilishni xohlamaydi, sukut saqlashga qaror qilishadi. Katta oilaning barcha a’zolari o‘layotgan ayol bilan xayrlashishga ulgurishi uchun unga qarindoshlari nabirasining to‘yiga kelishayotgani aytiladi, aslida u turmushga chiqmoqchi emas.
