AQSH HAMAS garovida saqlanayotgan odamlarni dronlar bilan qidirmoqda — Reuters
AQSH HAMASning Isroilga hujumi vaqtida guruh tomonidan garovga olinganlar haqida ma’lumot to‘plash uchun G‘azo sektorida kuzatuv dronlaridan foydalanmoqda.
Bu haqda Reuters agentligiga amerikalik ikki amaldor ma’lum qildi, ulardan biri Amerika dronlari G‘azo sektori ustida bir haftadan buyon uchib yurganiga aniqlik kiritdi.
Agentlik suhbatdoshlariga ko‘ra, AQSH rasmiylari HAMASning Isroilga hujumidan so‘ng bedarak yo‘qolganlar ro‘yxatiga kiritilgan o‘n nafar amerikalik asirlikda bo‘lishi mumkinligini istisno etmaydi. HAMAS garovga olinganlarni G‘azo sektorida qazilgan tunnellar tarmog‘idan birida ushlab turgani taxmin qilinmoqda.
So‘nggi ma’lumotlarga ko‘ra, HAMAS 240 dan ortiq odamni, jumladan, boshqa davlatlar fuqarolarini garovga olgan. Xabar qilinishicha, Germaniya Kiprga Maxsus kuchlar qo‘mondonligidagi askarlarni joylashtirgan — ular Bundesverning elita maxsus kuchlari bo‘limi hisoblanib, boshqa vazifalar qatorida garovga olinganlarni ozod qilishga ixtisoslashgan.
